Vyama vya Muziki Vyatakiwa Kufuata Taratibu Kabla ya Kukutana na Viongozi wa Serikali

VYAMA vya Muziki nchini vimetakiwa kufuata, Sheria, Taratibu na Kanuni

pindi Wanachama wake wanapopanga kukutana na baadhi ya Viongozi wa

Serikali. 

Ushauri huo umetolewa leo jijini Dar es Salaam na Kaimu

Mkurugenzi Msaidizi wa masuala ya Lugha, Wizara ya Habari, Utamaduni,

Sanaa na Michezo, Bi. Husna Kitogo ambaye alimwakilisha Mkurugenzi wa

Sanaa Wizarani hapo wakati alipokutana na Mashirikisho ya Vyama vya

Muziki nchini.

Bi. Kitogo amesema kwamba kumekuwa na tabia kwa baadhi ya Wasanii

Wanachama na wasio wanachama kukutana na baadhi ya Viongozi wa juu

wa Serikali pasipo Wizara kupewa taarifa jambo ambalo ni kinyume na

utaratibu na kuwataka kufuata Sheria na utaratibu mzuri wa kufanya

mawasiliano na Wizara kabla ya kufanya hivyo.

“Msifanye kazi kwa mazoea, kwani mnapojiamulia kukutana na Viongozi

wa Serikali pasipo kuijulisha Wizara mnakosea kwani Serikali inafanya kazi

kwa kuzingatia Sheria, Taratibu na Kanuni, na baadhi ya watu wanaofanya

hivi pindi wanapokwama utaona wanarudi kwetu, jitahidini kujenga

utaratibu hata wakutuletea nakala ya barua ili sisi tuweze kuwasaidia

katika kukutana nao hao viongozi,” alisema Kitogo.

Kwa upande wake Katibu Mkuu Taifa wa Chama cha Madj wa Muziki

Tanzania (TDMA) Bw. Asanterabbi Mtaki ametaja baadhi ya changamoto

zinazowakabili ni pamoja na Usajili wa Vikundi, vibali vya kufanyia kazi,

masuala ya Haki Miliki (Copy rights), kodi za bidhaa za muziki pamoja na

usimamizi wa mapato ya kazi za sanaa.

Amesema kwamba, baadhi ya Wanamuziki nchini wamekuwa hawatambui

umuhimu wa kujiunga na Mashirikisho pamoja na vyama mbalimbali hali

ambayo inadidimiza tasnia ya sanaa kwani kunapelekea kukosekana kwa

ushirikiano katika kujenga taifa, kutokana na hali hiyo ameishauri Serikali

kuwasimamia wanamuziki ambao bado hawajajiandikisha katika Vyama

kufanya hivyo ili kuleta nguvu ya pamoja katika kupigania haki za Wasanii

nchini.

“Naishauri Serikali kuliangalia suala hili la baadhi ya wasanii

kutojiandikisha katika vyama na ndiyo hawa wasanii ambao wamekuwa

wakikutana kimya kimya na Viongozi wa juu wa Serikali na baadhi ya yao

hawako katika Mashirikisho ama Vyama vya Wasanii, hii ni changamoto

kwetu sisi, tunaiomba Serikali itusaidie kuwapa elimu hawa watu ili wajue

faida na umuhimu wa kujiunga na vyama,” alisema Mtaki.

Naye Mwanamuziki Mkongwe na Makamu wa Rais wa Shirikisho la Muziki

wa Dansi Tanzania (CHAMUDATA) maarufu kama Bw. Juma Ubao

ameiomba Serikali kuendelea kuzisimamia haki za Wasanii nchini hususani

katika suala zima la Haki Miliki zao kwani ndiyo kilio chao cha muda

mrefu.

“Ushirikiano baina ya Serikali na Vyama vya Wanamuziki nchini uzidi

kudumu na hivyo tunaiomba Serikali itusaidie katika kupunguza kodi kwa

bidhaa za muziki kwani kwa kufanya hivyo kutatuondolea adha ya

kununua vifaa visivyo na ubora, kwani tunajikuta tunanunua vifaa hivyo

kutokana na kushindwa kununua vyenye ubora zaidi vitokavyo nje

kutokana na kodi yake kuwa kubwa.”

Katika kikao hicho, baadhi ya mapendekezo waliyokubaliana ni pamoja na

suala la usajili unaofanywa na Baraza la Sanaa Tanzania (BASATA)

kutambua uwepo wa Shirikisho la Vyama vya Muziki Tanzania, uboreshaji

wa Sheria pamoja na Sera ya Sanaa, Wasanii kulipwa kutokana na kazi

zao zitumikazo katika baadhi ya Vyombo vya habari nchini pamoja na

Wanafani wote nchini kupitia katika Vyama husika.

Kikao hicho kilichoitishwa na Wizara kiliwakutanisha Wajumbe mbalimbali

toka Chama cha Madj wa Muziki Tanzania (TDMA), Chama cha Muziki wa

Dansi Tanzania (CHAMUDATA), Chama cha Taarab Tanzania (TTA),

Chama cha Muziki wa Kizazi Kipya (TUMA), Chama cha Muziki wa Injili

Tanzania pamoja na Vyama venginevyo lengo likiwa ni kutambua baadhi

ya changamoto mbalimbali zinazoikabili vyama hivyo.