Kiwanda cha 21st Century chaungua moto

Kiwanda cha Nguo cha 21st kilichopo Kihonda Morogoro kimewaka moto huku baadhi ya mitambo, nguo na malighafi katika Kiwanda vimeteketea kwa moto.

Akizungumzia moto huo Clement Munisi, meneja uzalishaji wa kiwanda hicho

amesema kuwa, moto huo ulianza saa 12:00 asubuhi leo katika mashine moja

ya kuzalishia nguo.

Amesema, wafanyakazi walijaribu kuuzima kwa kutumia kifaa maalumu cha

kuzima moto (Fire extinguisher ) bila mafanikio.

Munisi amesema kuwa, moto huo uliunguza baadhi ya mitambo na malighafi

zilizokuwa katika chumba kimoja ndani ya kiwanda hicho na kusababisha

hasara kubwa.

Amesema kuwa, moto huo uliendelea kuenea katika vyumba vingine ndani ya

kiwanda hicho jambo ambalo lililosababisha baadhi ya nguo zilizokuwa

zikiendelea kutengenezwa kuungua.

Hata hivyo, hajaeleza thamani halisi ya vitu vilivyoteketea kwa moto.

Ramadhani Pilipili, Kamanda wa Kikosi cha Zimamoto Mkoa wa Morogoro

amesema kuwa, licha ya kuwahi kufika mapema katika eneo la tukio na juhudi

za kuuzima moto, bado miundombinu ya kiwanda hicho imekuwa kikwazo.

“Miundombinu ya kiwanda ni tatizo kutokana na kukosekana eneo sahihi la

kupitishi mipira ya maji na hivyo kulazimika kutumia muda mwingi kwa kuvunja

ukuta ili kufanikisha zoezi la uzimaji,” amesema.