AJALI YA NOAH,LORI ILIYOUA 19 SHINYANGA YANG’OA VIGOGO WA POLISI.

  Jeshi la polisi nchini kupitia kikosi cha usalama barabarani limewavua nyadhifa zao mkuu wa kikosi cha usalama barabarani mkoa wa Tabora Shida Machumu, na mkuu wa usalama barabarani wa wilaya ya Nzega Thomas Sengecha kwa kushindwa kuwasimamia askari wa usalama barabarani na kusababisha kutokea kwa ajali ya Noah na lori iliyoua watu 19 na kujeruhi wawili mkoani Shinyanga.

Uamuzi huo umetolewa leo na kaimu kamanda wa kikosi cha usalama barabarani nchini SACP Fortunatus Muslimu wakati akitoa taarifa kwa vyombo vya habari mkoa wa Shinyanga kuhusu hatua zilizochukuliwa na jeshi la polisi baada ya kutokea kwa ajali hiyo.

“Noah ilianza safari katika kituo cha Nzega majira ya saa 12:30 jioni Novemba 06,2016, ikiwa na abiria 17 kati yao watu wazima 13 na watoto wanne waliokuwa wamepakatwa na wazazi wao ...wakati gari linaondoka askari waliopangwa kazini eneo hilo walikuwa wameshaondoka kituoni...,gari hilo halikukaguliwa hivyo kutoa mwanya kwa gari hilo kubeba abiria kupita kiasi kwa kuzidisha abiria”,ameeleza Muslimu.

Amesema  kitendo cha askari kuondoka eneo la tukio,kilifanya gari izidishe abiria watano watu wazima na watoto wanne kwani Noah inapaswa kubeba abiria wanane (8) na si vinginevyo kwa mujibu wa sheria.

Amebainisha kuwa vile vile askari waliopangwa kazini barabarani eneo la Uchama- Nzega nao walikuwa wameondoka eneo hilo  hivyo kutoa mwanya mwingine wa gari hilo kubeba abiria wengine wanne njiani eneo la Nata ambapo inadaiwa kulikuwa na basi lilikuwa limeharibika na abiria kusimamisha Noah.

“Noah ilisimama na abiria kulazimisha kupanda ndani ya gari hilo na hivyo kuongeza idadi ya abiria katika gari hilo kufikia jumla ya watu 21 pamoja na dereva na hivyo ndani ya Noah kuwa na watu 22 na dereva akaendesha gari kwa mwendo kasi bila kuchukua tahadhali na kasha kugongana na lori”,ameongeza Muslimu.

Amesema ajali hiyo imechangiwa na uzembe wa askari hivyo mkuu wa usalama barabarani wa wilaya ya Nzega Thomas Sengecha na mkuu wa usalama barabarani mkoa wa Tabora Shida Machumu wanavuliwa nyadhifa zao kwa kushindwa kutekeleza mkakati wa kupunguza ajali na kushindwa kusimamia na kuchukua hatua kwa watendaji walio chini yao.

Mbali na kuvuliwa nyadhifa zao pia wanaondolewa katika kikosi cha usalama barabarani na watapangiwa kazi nyingine.

Kamanda Muslimu amesema askari wanne waliopangwa katika kituo cha mabasi cha Nzega ambao ni SGT Charles,E.6547 CPL Kheri,WP 6983 PC Happy na WP 7676 PC Neema na wawili kituo cha Buchama,WP 5791 PC Cecy na WP 7165 PC Aziza watachukulia hatua za kinidhamu na wanaondolewa moja kwa moja katika kikosi cha usalama barabarani.